Демократската американска потпретседателка Камала Харис има три проценти предност пред републиканскиот претседателски противкандидат Доналд Трамп – 45 проценти наспроти 42 проценти, покажува новата анкета на Ројтерс и Ипсос.
Харис исто така има три процентни поени предност меѓу гласачите кои најверојатно ќе излезат на гласање: 47 отсто се за демократ, а 44 отсто за републиканец.
Стандардната грешка на анкетата е околу 4 отсто, пишува Ројтерс.
Иако јазот меѓу двајцата кандидати не е премногу различен од истражувањето спроведено пред една недела, новата анкета завршена до недела покажува знаци дека гласачите, особено демократите, се позаинтересирани за овогодинешните избори отколку во 2020 година, кога актуелниот претседател Џо Бајден го победи Трамп.
Околу 78 отсто од регистрираните гласачи анкетирани во тридневната анкета, вклучително и 86 отсто од демократите и 81 отсто од републиканците, изјавија дека се „речиси сигурни“ дека ќе излезат на гласање на 5 ноември. Овој процент порасна од 74 отсто колку што беше во истражувањето спроведено пред пет години во речиси истиот период.
Ројтерс и Ипсос анкетираа 938 Американци на национално ниво, вклучително и 807 регистрирани гласачи, онлајн.
