Во своето обраќање по повод Денот на народното востание, претседателот на СДСМ, Венко Филипче, нагласи дека Социјалдемократскиот сојуз на Македонија е продолжувач на борбата и вредностите на Народноослободителната борба (НОБ) и АСНОМ.
„СДСМ е партија која ги носи корените на храбрата партизанска борба и вредностите кои ги постави АСНОМ. Нашето наследство од тие славни денови на борба за слобода и правда ги дефинираат нашите вредности и денес. Ние продолжуваме да работиме во духот на победничката традиција на НОБ, секогаш стремејќи се кон слобода, социјална правда, независност и напредок,“ изјави Филипче.
Тој потсети дека партизанската борба била израз на стремежот на македонскиот народ и сите етнички заедници за слобода и државност, и дека токму таа борба го постави темелот на современата македонска држава. „Нашиот народ, заедно со останатите етнички заедници, застана на вистинската страна на историјата и заедно ја извојува победата за сопствената држава,“ рече Филипче.
Во контекст на современите предизвици, тој истакна дека СДСМ и денес го продолжува својот пат како партија која ги брани интересите на граѓаните и се бори за подобра иднина. „Како наследници на вредностите на НОБ и АСНОМ, ние секогаш ќе работиме за слободата, правдата и напредокот на нашата држава. Токму тие вредности ги носиме во секоја наша битка,“ додаде тој.
Филипче исто така ја осуди актуелната власт за откажувањето од европската иднина на Македонија, нагласувајќи дека СДСМ никогаш нема да се откаже од стратешките интереси на државата. „Како што партизаните се бореа за слобода и правда, така и ние денес се бориме за интеграција и напредок во европското семејство,“ порача претседателот на СДСМ.
Со ова обраќање, Филипче уште еднаш ја потврди посветеноста на СДСМ на идеалите на НОБ и АСНОМ, истакнувајќи ја партијата како наследник на тие светли традиции кои се темел на македонската државност.
