Претседателот на Русија, Владимир Путин, нареди регрутирање на 133.000 лица за воена служба во периодот октомври – декември годинава.
Регулативата беше објавена денеска на порталот за правни информации, пренесе Интерфакс.
„Од 1 октомври до 31 декември 2024 година за воена служба ќе бидат регрутирани 133.000 граѓани на Руската Федерација на возраст од 18 до 30 години кои не се во резерва и се предмет на регрутирање на воена служба“, се наведува во документот.
Со истиот указ, претседателот на Русија нареди отпуштање од воена служба на војници, морнари, наредници и офицери на кои воениот рок им истекол.
Генералштабот соопшти дека регрутите нема да бидат испратени да учествуваат на воена служба во новите региони на Руската Федерација.
„Би сакал да забележам дека воениот персонал кој служи воена служба нема да биде вклучен во извршувањето на задачите за специјални воени операции во новите региони“, рече Владимир Цимљански, заменик-началник на Главниот организациски и мобилизациски оддел на Генералштабот на Руската Федерација.
Според неговите зборови, рокот на воениот рок нема да се менува и ќе биде 12 месеци, а од 15 октомври е планирано испраќање на регрути од собирните пунктови.
За време на пролетната кампања за регрутирање оваа година, според указот на претседателот на Русија, на задолжителен воен рок биле повикани 150.000 регрути.
Според официјалните податоци, при последното есенско регрутирање на воен рок биле испратени 130.000 лица.
Од 1 јануари 2024 година стапија на сила измените во системот на служење на воениот рок за регрутирање до 30 годишна возраст.
