Швајцарската полиција уапси неколку лица откако 64-годишна жена изврши самоубиство користејќи таканаречена „капсула за евтаназија“.
Капсулата „Сарко“, која никогаш претходно не била користена, е дизајнирана да му овозможи на лицето внатре да притисне копче кое вбризгува азотен гас во запечатената комора. Лицето потоа треба да заспие и да почине од задушување за неколку минути.
Полицијата во соопштението наведе дека обвинителите биле информирани од адвокатска канцеларија дека асистирано самоубиство со капсула „Сарко“ се случило вчера во близина на шумска кабина во Меришаузен во северна Швајцарија.
Во јули, групата за потпомогнато умирање, која го промовира уредот „Сарко“, рече дека очекува уредот да се користи за прв пат оваа година.
Поддржувачите велат дека обезбедува опција која не се потпира на лекови или лекари и го проширува пристапот до евтаназија.
Сепак, многумина стравуваат дека модерниот дизајн на уредот го велича самоубиството, а фактот што може да се ракува без лекарски надзор е, посочуваат, загрижувачки.
Патем, потпомогнатото умирање е нелегално во повеќето европски земји, но со текот на годините илјадници патувале во Швајцарија за да си стават крај на сопствениот живот.
