Утре, 20 септември, во 11.00 часот, на Европски универзитет Скопје ќе се одржи 14. Меѓународна конференција под наслов „Современи аспекти на техничките, општествените, уметничките и медицинските системи“ во организација на Факултетот за информатика при Европскиот универзитет Скопје.
Мисијата на конференцијата се состои во стимулирање и презентирање на достигнувања и идеи од последните истражувања поврзани со овие области, како и можности за идни истражувања и соработки.
Темата на оваа конференција укажува на мултидисциплинарност, а причина за тоа е секојдневниот раст и развој на сите научни дисциплини и обидите за заеднички истражувања поврзани со уметноста. Општо е познато дека не може да постои напредок на научен и општествен план, доколку не се имплементираат поефикасни форми на промислување, дејствување и однесување. Поинаку кажано, потребни се континуирани нови пристапи за донесување одлуки, расудување, креирање идеи и спроведување на идеите.
Светските случувања, произлезени од пандемијата, енергетската криза, економската рецесија и воените судири длабоко влијаат врз чувството на сигурност, безбедност и перспективност на глобално ниво. Тоа генерира нов пристап кон стопанските текови, кон безбедносните прашања и кон научните современи аспекти, како клучни приоритети во современиот начин на живеење. Новото време бара и нови вредности на промислување и дејствување. Поквалитетните услови за живот на светската популација е глобална цел, така што без создавање подлога за имплементирање нови вредности, невозможно е да се изгради здраво општество и напредно човештво.
Во оваа комплексна ситуација не треба да заостанат ниту науката, ниту уметноста, туку тие да бидат едни од водечките сили во потрагата по новите вредности, односно поефективен развој и поефикасни форми на хармонична егзистенција.
Целта на конференцијата е да се подготват, презентираат, образложат и соочат научни, стручни и уметнички трудови кои ги констатираат и респектираат ограничувањата и стимулирањето во откривањето, анализирањето и воопштувањето на идеи, теми, прашања, проблеми и проекции во научната и уметничката сфера. Размената на искуства, на информации за настанувањето на поединечните инспирации и начините на создавање на трудовите се, исто така, важна цел на конференциското соочување, дебатирање и сублимирање.
На конференцијата ќе се презентираат и научни трудови и уметнички дела.