По топлиот почеток на септември, Европа се соочува со рекордни врнежи од дожд и поројни поплави во делови од централните и источните земји.
Бурата „Борис“ за само еден ден поплави големи површини во Полска, Романија, Австрија, Чешка и Унгарија.
Во поплавите животот го загубија неколку лица, а неколку исчезнаа.
Бурата Борис
Бурата Борис, систем со низок притисок кој бавно се движи, во моментов носи екстремни обилни врнежи низ централна и источна Европа, со прогноза за дополнителни врнежи барем до крајот на понеделник.
Според „Би-Би-Си“, постојат две причини зошто бурата била толку разорна:
1. Повлечена влага од екстремно топлите мориња, Црното и Медитеранот, во комбинација со студениот воздух од север.
2. Постои област со низок притисок што е заглавена помеѓу висок притисок на исток и запад во блокирана временска шема.
World Weather Attribution Network заклучи дека веројатноста и интензитетот на големи поплави во Европа се зголемуваат поради климатските промени, откако беа сведоци на сериозни поплави во 2021 година.
Обилни дождови
Повеќето делови од Чешка беа погодени бидејќи властите објавија највисоки предупредувања за поплави на околу 100 места низ земјата. Ситуацијата беше најлоша во двата североисточни региони кои забележаа најмногу врнежи во последните денови, вклучително и планините Јесеники во близина на границата со Полска.
Градовите и селата во планините Јесеники беа потопени и изолирани од бесните води кои ги претворија патиштата во реки. Силниот ветер собори десетици дрвја, оштети автомобили и бројни мостови, а ги блокираше патиштата и сообраќајот. Градоначалничката на Јесеник, Зденка Блистанова, за чешката јавна телевизија изјави дека неколку куќи во него и други околни места се уништени во поплавите.
Според Асошиејтед прес, околу 260.000 домаќинства биле без струја во неделата наутро низ целата земја, додека сообраќајот бил запрен на многу патишта, вклучувајќи го и главниот автопат Д1.
Реката Одра, која се влева во Полска, достигна екстремни нивоа во градот Острава и Бохумин, што предизвика евакуација. Во регионот речиси и да нема воз.
Австриската општина Лилиенфелд со околу 25 илјади жители е отсечена од надворешниот свет. На жителите им било кажано да ја зовриваат водата од чешма како мерка на претпазливост. Особено е опасна ситуацијата покрај реката Камп, која се влева во Дунав, пренесува firstpost.com.
Резервоарот Отенштајн на реката функционира како тампон, но надминувањето на нејзините граници може да предизвика нови поплави, велат експертите. Во Виена, реката Виена се излеа од коритата, поплавувајќи ги куќите и принудувајќи ги првите евакуации на околните куќи.
Во Глухолази надојдените води го излеаа насипот на реката и поплавија улици и куќи. Градоначалникот Павел Шимкович рече: „Се давиме“ и апелираше до жителите да се евакуираат на повисоките места.
Мост во градот се урна под притисокот на поплавата, а зградата на полициската станица се урна во Строние Шлаские откако надојдените води пробија брана. Потопени автомобили можеа да се видат на многу места во регионот на долината Клоџко што се граничи со Чешка, бидејќи таму се очекуваше нов бран поплави.
Полските власти, исто така, беа принудени да го затворат граничниот премин Голковице со Чешката Република, откако реката се излеа од коритото, и да затворат неколку патишта и да запрат возови на линијата што ги поврзува градовите Прудник и Ниса, според „Гардијан“.
Во градот Јеленија Гора, кој брои околу 75 илјади жители, улиците во центарот на градот се поплавени откако пукна еден од насипите на реката Бобр.
Словачка прогласи вонредна состојба во главниот град Братислава. Обилните врнежи се очекува да продолжат барем до понеделник во Чешка и Полска.
Градоначалникот на унгарската престолнина Будимпешта Гергели Карачони предупреди: „Според прогнозите, една од најголемите поплави во последните години се приближува кон Будимпешта, но ние сме подготвени да се справиме со тоа“.
Во последните два дена шест лица загинаа во поплавите на југоистокот на Романија. Најпогоден беше регионот на Галати, каде беа оштетени над пет илјади домови.
Пожарникар загина откако „се лизна по скали“ додека го испумпуваше поплавениот подрум во градот Тулин, Австрија.
Во Полска се претпоставува дека едно лице загинало во поплавите на југозапад, изјави во неделата премиерот Доналд Туск.
Во Чешка се водат како исчезнати четири лица кои водата ги однела, соопшти полицијата. Тројца од нив биле во автомобил што го однела река во североисточниот град Липова-лазне, додека уште еден маж исчезнал откако бил однесен од поплави на југоисток, тврди „Гардијан“.
