Во Индија е регистриран првиот случај на мајмунски сипаници кај маж кој допатувал во Индија од земја каде веќе е регистрирана инфекцијата.
Заразениот е изолиран во болница и е во стабилна состојба, соопшти денеска индиското Министерство за здравство. Министерството не прецизираше кој вид на вирус може да има пациентот.
Мајмунските сипаници може да се пренесат со близок контакт. Инфекцијата е фатална во ретки случаи. Предизвикува симптоми слични на грип и меурчиња полни со гној на телото.
Локалните медиуми минатиот месец јавија дека Индија е во состојба на зголемена готовност, откако новиот вид на мајмунски сипаници се прошири низ Африка.
Светската здравствена организација претходно го прогласи ширењето на мајмунските сипаници во Конго и на други места на африканскиот континент за глобална опасност.
