Во периодот од јануари до август 2024 година, Регулаторната комисија за енергетика, водни услуги и услуги за управување со комуналниот отпад (РКЕ) издаде лиценци за нови фотонапонски централи за производство на електрична енергија од обновливи извори, со вкупна инсталирана моќност од речиси 250 MW. Овие лиценци претставуваат значаен чекор кон зголемување на капацитетите за обновлива енергија во земјата.
– Станува збор за инвестиции што се резултат на приватна иницијатива. Главно, се работи за компании што инсталираат фотонапонски панели за да ги задоволат своите енергетски потреби. Со произведената енергија од овие капацитети, може да се снабдуваат околу 80 000 домаќинства – изјави Марко Бислимоски, претседател на РКЕ.
Во текот на 2023 година, РКЕ издаде лиценци за производство на електрична енергија од обновливи извори со вкупна моќност од 399 MW, што претставува значителен раст во споредба со 2022 година, кога беа издадени лиценци за 152,2 MW.
