Од почетокот на следната година во Унгарија ќе стартува таканаречената програма „Златна унгарска виза“, која ја одобри Владата на премиерот Виктор Орбан.
Со купување на недвижен имот во Унгарија, инвеститорот ќе добие право на десетгодишен престој во земјата, а ќе добие и унгарски пасош, што ќе му овозможи неограничено движење во Шенген зоната. Условот е купување на недвижен имот во вредност од најмалку половина милион евра.
Друга опција за добивање на десетгодишна дозвола за престој и унгарски пасош е да се инвестираат најмалку 250.000 евра во инвестициски фондови за недвижнини издадени од Унгарската народна банка. Третата опција е јавна донација од најмалку еден милион евра.
Иако европските земји ја напуштаат програмата за „златна виза“, Унгарија повторно ја лансира во 2025 година и на богатите странци им нуди можност да живеат и работат во земјата во замена за големи инвестиции. Со други зборови, во таа земја, која е членка на Европската унија од 1 мај 2004 година, можете да ги добиете сите придобивки од животот, но за одредена сума пари.
Оваа програма може да предизвика незадоволство во Европската унија бидејќи не ги исклучува граѓаните на Русија и Белорусија, и покрај фактот што Русија води војна против Украина, а Белорусија ја поддржува руската агресија.
Од јули оваа година, руските и белоруските граѓани можат да влезат во ЕУ преку Унгарија како странски работници со национална лична карта, што им овозможува слободно да се движат во Шенген.
