Германија издаде европска потерница за украински инструктор по нуркање, кој наводно бил дел од тимот одговорен за експлозијата на гасоводот „Северен тек“, се наведува во извештајот на три германски медиуми.
Германската полиција верува дека Володимир З, за кој се знае дека живеел во Полска, бил еден од нуркачите кои поставиле експлозивни направи на цевководите што водат од Русија до Германија под Балтичкото Море во септември 2022 година, објавија денеска весниците SZ и Die Zeit, како и германскиот јавен сервис АРД, повикувајќи се на неименувани извори, пренесува Ројтерс.
Канцеларијата на германското државно обвинителство одби да го коментира извештајот. Во јуни, Германија побара од Полска да го уапси споменатиот човек, се наведува во извештајот.
Денеска магазинот „Spiegel“ (Шпигел), повикувајќи се на извори, објави дека верува дека осомничениот ја напуштил Полска. Уште еден маж и жена, исто така украински инструктори за нуркање, се осомничени за саботажа, но засега по нив не е распишана потерница, наведуваат споменатите медиуми.
Останува нејасно кој стои зад експлозиите што уништија три од четирите гасоводи, кои станаа симбол на зависноста на Германија од рускиот гас од почетокот на војната во Украина во февруари 2022 година. Шведските инспектори пронајдоа траги од експлозив на неколку предмети пронајдени на местото на експлозијата, потврдувајќи дека тоа било намерно.
Минатиот јануари, Германија изврши рација на брод за кој рече дека можеби се користел за транспорт на експлозиви и ги извести Обединетите нации дека веруваат дека обучени нуркачи можеле да ги прикачат уредите на цевководи на длабочина од околу 70 до 80 метри.
