Шпанскиот тенисер Карлос Алкараз, втора сезона по ред, го освои пехарот на грен-слем турнирот Вимблдон откако, во финалето, го победи најтрофејниот тенисер на сите времиња, Србинот Новак Ѓоковиќ. Овој пат шпанскиот тенисер доминираше во текот на целиот меч, на кој славеше со 6:2, 6:2, 7:6.
Сепак, Шпанецот има голема почит кон српскиот тенисер, кого го поддржува со комплименти и кога ќе го победи. Така прават сите, дури и оние што не се сакаат, тогаш им се провлекува некој убав збор од устата. Алкараз го покажува тоа на микрониво, преку работи што често никаде не можат да се видат јавно. Конечно, тие зборови кажани по натпреварот имаат различни нивоа. Пред сè, се искрени.
– Сè уште верувам дека Новак е Супермен. Она што го направи на турнирот по операцијата е неверојатно. На теренот зборував за работата што ја направија Новак и неговиот тим. Тој не е од овој свет, бидејќи, и по операцијата на коленото, успеа да стигне до финалето на турнирот. Тој е Супермен! – изјави Алкараз на прес-конференцијата по шампионатот.
Ниту Ѓоковиќ не му остана должен. Подготвен е да му ја предаде палката на лидерот на новата генерација кога ќе треба.
– Логично е да се зборува за тоа. Луѓето постојано бараат некој нов кој доминира во тенисот и за кого ќе навиваат. Многумина, веројатно, не се задоволни што сум тука, па затоа бараат нов лидер. Тоа е составен дел од мојата кариера. Луѓето се тука за да разговараат. Колку е поголема сцената толку повеќе луѓе ќе ве слушнат на самото место, а потоа може да ги поткрепите вашите приказни со факти – одговори Новак на убавите зборови.
Засега, Алкараз е главен фаворит за пополнување на „дупката“, иако Ѓоковиќ не се предава и на 37 години. Тој сè уште е страв и трепет за конкуренцијата, а така ќе биде и на претстојните Олимписки игри, кои почнуваат за десет дена, во Париз.
