Прекрасна музичка магија во Прилеп!
Македонската музичка ѕвезда Андријана Јаневска направи вистински концерт за долго памтење, на платото пред велелепната црква „Св. Петка“ во Прилеп. Шармантната и распеаната Јаневска беше придружувана од изведбите на народни инструменти од Ратко и Драган Даутовски, со што севкупниот настап се претвори во магија.
Концертот имаше хуманитарен и донаторски карактер, а беше насловен како “Од векови за векови”. Целта од собраните пари е да се доизгради ова духовно светилиште.
Вистина е дека разубавената Андријана маестрално пее, а големо силно ракоплескање од многубројната публика доби кога ги испеа патриотските: „Заветна”, „Ја излези Ѓурѓо”, „Кога падна на Пирина”… Во таа топла летна ноќ се уживаше максимално, во фантастичните звуци на инструментите и гласот на пејачката, во нејзините интерпретација. Скромна како и секогаш, Андријана со одбрани зборови ја поздрави публиката кои збиени еден до друг и на ова жешко време, сакајќи да бидат што поблиску до својата естрадна миленичка.
Граѓаните им честитаа за настанот на црковниот одбор на храмот, протоереј Љупче Петрески и професорот Мендо Ташкоски, кои беа главни „виновници” за ова ретко музичко случување.
–Овој хуманитарен концерт e посветен на доизградбата на духовното светилиште, архитектонскиот бисер, храмот „Св. Петка“ во нас. Точила, Прилеп, за мене е еден од најинспиративните концерти во мојата досегашна кариера. Огромна благодарност до отец Љупче Петрески за поканата и беспрекорната организација. Секако и до моите колеги Драган и Ратко Даутовски, кои со виртуозноста на своите инструменти придонесоа концертот да звучи маестрално и светски, порача искрено големата Андријана. Д.М.