Двокатниот автобус на ЈСП кој вчера удри во жардињера во близина на ТЦ „Мавровка“ бил технички неисправен, тврди возачот и претседателот на Конфедерацијата на синдикални организации (КСОМ), Марјан Ристески. За директорот на ЈСП, Драги Кушовски, овие изјави се „паушални“ и смета дека треба да се почека официјалниот извештај на МВР.
Ристески повикувајќи се на сознанија добиени од страна на возачи кои го управувале автобусот, рече дека во неколку наврати било алармирано дека автобусот е технички неисправен, но сепак, со потпис и печат бил пуштан да сообраќа како технички исправен. Тој посочи дека истиот автобус изминатиот период сообраќал и на линија до Водно.
– Мораме јавно да проговориме за она што се случи, бидејќи е загрозена безбедноста на граѓаните кои го користат превозот на Јавното сообраќајно претпријатие. Имаме сознанија дека истиот овој автобус што вчера удри во жардињера на булеварот во близина на „Мавровка“, пред извесен период го користеле на линија до Водно. Замислете доколку такво нешто се случело тогаш, затоа што се работи за технички проблем на автобусот, додека шоферот максимално направил што можел – рече Ристески.
Според Ристески, виновник за несреќата на автобусот е градоначалничката на Град Скопје, Данела Арсовска.
– Директен виновник е градоначалничката на Град Скопје, Данела Арсовска. Неможе со нејзиното однесување и ароганција према вработените и синдикатите, не може постојано да се менуваат директори на Јавните претпријатија и само таа да е исправна – рече Ристески.
И додека Ристески и возачот на автобусот ги даваа изјавите пред дирекцијата на ЈСП „Скопје“, упадна новиот директор на ЈСП, Драги Кушовски, кој тврдеше дека информациите изнесени од страна на КСОМ се „паушални и треба да се почека официјалниот извештај на МВР“.
– Вие немате официјален извештај од МВР кои се причините за сообраќајката, дека воланот откажал. Да оставиме на службите да утврдат зошто е настаната ситуацијата. Возилото има технички преглед и е редовно сервисирано – рече Кушовски.
Ситуацијата ескалираше по упадот на Кушовски, по што изјава даде и возачот на автобусот кој кажа дека забележал дека автобусот не е исправен.
– Јас забележав дека автобусот не е исправен. Јас ќе пријавам дефект и утредента истиот автобус го земаме со потпис и печат дека е сервисирано и исправно е за линија. Со години сообраќам на линијата 2-ка, од Сарај до Автокоманда и обратно, ги знам најситните дупки. Таа линија ја возам и мене не може онакво нешто да ми се случи. Мене ми побеле коса од волан и сега јас целиот се ежам додека зборувам. Жал ми е за патниците, пред се, кои добија стрес и за мене исто така – рече возачот.
Инцидентот се случил во 14:50 часот и бил пријавен во СВР Скопје. Во сообраќајната несреќа беа повредени три жени, од кои едната се пожалила на болки во колкот, а другите две се здобиле со полесни повреди. Сите три со возило на Брза помош беа пренесени во Клиниката „Свети Наум Охридски“. Полициски службеници на СВР Скопје веднаш излегле на местото на настанот.
