Ураганот Берил, кој ги израмни островите на источниот брег на Карипското Море, за неколку часа ќе ја погоди Јамајка. Досега седум лица загинаа во Гренада, Венецуела и Св. Винсент и Гренадини.
Станува збор за ураган кој завчера над Атлантскиот океан достигна петта, максимална категорија, а потоа ослабе до четврта, која се смета за „потенцијално катастрофална“.
„Берил“ е и најсилниот ураган од ваков вид што некогаш бил забележан во овој период од годината.
Американскиот национален центар за урагани соопшти дека „окото“ на ураганот ќе помине во близина или над јужниот дел на Јамајка. Јамајканските власти соопштија дека владата „направила се што можела за да излезе на крај со ураган од оваа големина“.
Максималната брзина на ветерот на ураганот Берил достигнува 270 км/ч. Во Јамајка очекуваат разорни ветрови и покачување на нивото на морето опасно по живот за 2,7 метри.