Поранешниот американски претседател Барак Обама денеска призна дека демократскиот претседател Џозеф Бајден имал „лош“ настап во дебатата против републиканецот Доналд Трамп, но и покрај тоа го поддржал Бајден.
„Се случуваат лоши дебатни ноќи. Верувај ми, знам“, напиша Обама на платформата X, пренесе Ројтерс.
Тој посочи дека овие избори сепак се избор меѓу некој кој цел живот се борел за обичните луѓе и некој кој се грижи само за себе.
„Минатата ноќ не го промени тоа“, нагласи Обама.
Синоќа во студиото на Си-Ен-Ен се одржа првата дебата меѓу претседателските кандидати на претстојните избори во САД, Џозеф Бајден и Доналд Трамп.