Станува збор за политички трилер со примеси на црна комедија во продукција на „Ново македонско видео“, во кој главните ликови ги толкуваат актерите Никола Ристановски и Дарја Ризова, а клучни улоги имаат и Сашко Коцев и Оливер Митковски. Идејата за филмот е на Срѓан Јанаќијевиќ, сценариото е на Сашо Кокаланов и Дејан Дуковски, а главен продуцент е Сашо Пешев
Драматичен амбиент и исклучителна филмска екипа… На падините на Средно Водно вчера падна првата клапа на филмот, чиј работен наслов е „Касапско оро“.
Станува збор за политички трилер со примеси на црна комедија во продукција на „Ново македонско видео“ (Њу Момент), во кој главните ликови ги толкуваат актерите Никола Ристановски и Дарја Ризова, а клучни улоги имаат и Сашко Коцев и Оливер Митковски. Идејата за филмот е на Срѓан Јанаќијевиќ, сценариото е на Сашо Кокаланов и Дејан Дуковски, а главен продуцент е Сашо Пешев.
„Во општество полно со корупција, уредникот ветеран Бодан и амбициозната млада новинарка Софија, независно еден од друг, откриваат скандалозно видео. Одбивајќи да бидат замолчени од закани и мито, се соочуваат со опасна мрежа од политика, интриги, корупција и секс-скандали. Филмот навлегува во темниот, груб свет на моќта и хипокризијата кои влијаат врз секој слој од општеството“, откриваат од продукцијата.
Еден од сценаристите, Сашо Кокаланов, вели дека ова е филм за лажниот морал, не само на политичарите или на новинарите, туку на целото општество.
„Филмот не претендира да биде перцепција за македонското новинарство. Тоа е само некаков поширок контекст за една многу конкретна приказна. Ликовите од приказната не се пресликани реални личности, но се градени со многу ‘позајмици’ од лепеза вистински ликови од нашето општествено и медиумско милје“, посочи Кокаланов. Тој го „градеше“ сценариото заедно со Дејан Дуковски, успешно склопувајќи го мозаикот на приказната.
„Ова е приказна за фанатична храброст преку големи лични жртви да се добие Донкихотовска борба против крајно корумпираниот и криминален режим на власта, кој е спремен на сè за да ја задржи. Со голема веројатност сè да остане само уште едно мочање во ветер, приказната што ја раскажуваме го потенцира фактот дека основата на сите демократски општества е во слободата на медиумите кои на тој начин се и контрола на власта во однос на јавното мислење. Ова подразбира медиуми кои не се купени и не работат за ничии интереси. Слободни новинари за кои вистината мора да биде единствен интерес“, додава Дуковски.
Според режисерот Срѓан Јанаќијевиќ, филмот ќе биде визуелно впечатлив за да ја долови тензијата и борбата на главните ликови во потрага по правда и во корист на вистината и јавниот интерес. Додека тече професионалната и лична приказна на Бодан и Софија, интензивното дејство, кое се случува паралелно во само 24 часа, ќе ги внесе гледачите и во приватниот хаос на ликовите во потрага по правда, во морално амбивалентен свет.
Извршниот продуцент Сашо Пешев од „Њу Момент“ вели дека очекува интерес во јавноста и меѓу љубителите на филмската уметност „бидејќи во центарот на дејството ги има изложеноста и предизвиците на новинарската професија во транзициска држава каде што политиката, корупцијата и криминалот одат заедно.
Филмот е финансиран со минималниот буџет од Агенцијата за филм бидејќи е дебитантски филм на Срѓан Јанаќијевиќ и затоа има продукциски предизвици кои треба умно и креативно да бидат решени“.
Актерот Никола Ристановски за својот лик Бодан вели дека употребува лични критериуми и се обидува да сочува одредени лични и професионални кодекси во секоја сцена, во секој нареден миг на таа моќ.
„Работите никогаш не се црно-бели и тоа е главниот постулат во сценариото. Ама така е и во животот. Секое наше дејство, секој акт, секоја постапка, ни се враќа како бумеранг. И затоа ни се потребни критериуми, според кои ќе го изградиме ликот, критериуми кои се неопходни за дел по дел да го составуваме мозаикот“, вели Ристановски. Тој додава дека светот на медиумите не е одвоен од сите останати светови околу нас, само што тука има поголем концентрат…
„Овој свет не се одвојува од целото милје, само што тука интензитетот на сите случувања е на квадрат споредено со сите останати. Рефлексиите се посилни, реакциите се подраматични и повидливи“, истакнува Ристановски.
Дарја Ризова, пак, вели дека е инспирирана од ликот на Софија и потрагата по нејзините мотиви, односно нејзината лична приказна, како и границата до која таа е подготвена да отиде. Според неа, во основа истражувачкото новинарство е последниот бедем на јавниот интерес против злоупотребите на моќните.
„Во држави со дисфункционален или корумпиран правен систем како нашиот, оваа професија е и една од најризичните. Освен тоа, истражувачките новинари не се никогаш доволно платени, земајќи ги предвид личните жртви и одрекувања. Силата на овие медиуми зависи од независноста, а таа од изворот на финансирање. Филмот е објективен и реалистичен. Случувањата се доволно општи за да избегнат дневна политика, а на моменти неизбежно асоцијативни со случувања од нашето блиско и далечно минато“, вели Ризова.
Филмот ќе биде сниман на локации низ Скопје во период од три недели. Последниот кадар на „Касапско оро“ е планиран за крајот на јуни, во текот на летото ќе влезе во фаза на продукција и постпродукција и наесен ја очекува премиерата.
Фото: Ѕ. Плавевски
