Подмладувањето и одржувањето на младешкиот изглед отсекогаш биле дел од човековата аспирација да го надмине минувањето на времето. Од античките еликсири и млечни бањи до модерните естетски процедури, луѓето низ историјата барале начин да ја зачуваат младоста и убавината.
Денес, со напредокот на технологијата и медицината, ваквите обиди добиваат нови димензии, а многумина се подготвени да се подложат на контроверзни методи за да го остварат својот сон за вечна младост.
На таков чекор се одлучи и Марсела Иглесијас, 47-годишна жена од Лос Анџелес која гордо се претставува како „човечка Барбика“. Оваа вљубеничка во естетиката, која досега потрошила повеќе од 218.736 евра на естетски зафати, решила да оди чекор понатаму и да се обиде да го запре времето – со трансфузија на крвта на својот 23-годишен син.
Марсела верува дека крвта на помлад дарител има потенцијал да ги подмлади клетките и да го запре процесот на стареење. Оваа идеја се заснова на теории кои сугерираат дека крвта на младите може да го регенерира телото на постарите лица.
Сепак, овој метод е далеку од научно докажан. Американската Администрација за храна и лекови (ФДА) издаде предупредување дека трансфузијата на крв од млади дарители не е темелно тестирана, ниту пак е потврдена нејзината безбедност или ефикасност при подмладување.
ФДА истакна дека таквите процедури може да носат сериозни ризици, вклучувајќи ја и можноста за инфекции и имунолошки реакции. И покрај тоа, Марсела ги игнорира предупредувањата и сака што побрзо да помине низ овој процес.
