Јапонскиот премиер Фумио Кишида ја претстави меѓународната рамка за регулирање и користење на генеративната вештачка интелигенција (ВИ).
Кишида ова го соопшти во говорот пред Организацијата за економска соработка и развој (ОЕЦД) со седиште во Париз, пренесе АП, јави Танјуг.
„Генеративната вештачка интелигенција има потенцијал да биде витална алатка за понатамошно збогатување на светот“, рече Кишида, според преписот од неговиот говор обезбеден однапред.
Но, „мораме да се соочиме и со темната страна на вештачката интелигенција, како што е ризикот од дезинформации“, истакна тој во говорот на 2 мај.
Кога Јапонија претседаваше со Групата седум (Г7) водечки индустријализирани земји минатата година, таа го започна процесот на вештачка интелигенција во Хирошима за да создаде меѓународни принципи и кодекс на однесување за развивачите на вештачка интелигенција. Околу 49 земји и региони ја потпишаа доброволната рамка, наречена Процес на пријатели на Хирошима за вештачка интелигенција, рече Кишида.
Тие ќе работат на имплементација на принципи и кодекси на однесување за справување со ризиците од генеративната вештачка интелигенција и „да промовираат соработка за да се осигура дека луѓето ширум светот можат да имаат корист од употребата на безбедна и сигурна вештачка интелигенција“, нагласи тој.
Европската унија, САД, Кина и многу други нации се тркаат да развијат регулативи и надзор за вештачката интелигенција, додека глобалните тела како што се Обединетите нации се борат да ги надгледуваат, наведува агенцијата.
