Висок функционер на данската полиција откри дека агенциите за спроведување на законот наишле на случаи на шведски тинејџери кои извршиле тешки кривични дела во Данска во замена за големи исплати, јавува Анадолија.
Полицискиот истражител Торбен Сварер изјави за данските медиуми дека е пронајдена врска меѓу шведски тинејџери и дански криминалци по две престрелки оваа недела.
„Видовме дека криминалците на социјалните мрежи бараат луѓе кои се подготвени да извршат сериозни злосторства и дека младите Швеѓани, за жал, се согласуваат да го направат тоа за пари“, рече Сварер.
Тој додаде дека тоа го сфаќаат многу сериозно.
„Тие едноставно добиваат голема сума пари за да извршат насилно кривично дело, вклучително и убиство“, додаде Сварер.
Шведски тинејџери, на возраст од 17 и 16 години, се во истражен затвор во Данска, откако беа уапсени во врска со престрелките во Колдинг и Копенхаген во средата. Данската полиција тврди дека двајца тинејџери биле регрутирани од криминалци на социјалните мрежи.
Еден човек беше застрелан најмалку три пати во ногата во Колдинг, но никој не беше повреден во Копенхаген на Благардс пладс.
Во јуни, полицијата во Копенхаген уапси двајца шведски тинејџери за нивната наводна вмешаност во насилство од бандите во Брондби.
Статистиката на шведската полиција покажува дека во 2023 година биле регистрирани 283 вооружени напади меѓу ривалски банди.
Судирите резултираа со 44 смртни случаи и 87 повредени, што дава мрачна слика за тековниот конфликт на банди. Извештајот на шведскиот Национален совет за спречување криминал (BRA) дополнително ја нагласува сериозноста на ситуацијата, наведувајќи дека стапката на вооружени напади во последните години е „многу висока“ во споредба со другите европски земји.
Додека европскиот просек е 1,6 смртни случаи на милион луѓе годишно поради такви напади, Шведска има четири смртни случаи на милион луѓе.
