Планирањето за пензионирање може да биде стресно, а нов извештај од централната банка на САД, односно Федералниот резервен систем, покажува дека многумина Американци не почнале да штедат за животот по завршувањето со работата.
Федералниот резервен систем неодамна објави извештај за финансиите во домаќинствата во САД, базиран на шестото годишно испитување на економијата и носењето одлуки во домаќинствата, во чии рамки биле поставени серија прашања за финансиската и економската благосостојба и статусот на испитаниците.
Во рамките на истражувањето од испитаниците било побарано да кажат какви видови заштеди за пензија имаат. Така, 26 отсто од непензионираните возрасни Американци, без оглед на возраста, одговориле дека немаат заштеди за пензионерските денови.
