Цените на нафтата денеска пораснаа на меѓународните пазари до 82 долари, бидејќи намалената понуда и кинеската најава за економски стимул го турнаа во втор план очекуваниот пораст на каматните стапки во САД и во еврозоната.
На лондонскиот пазар цената на барелот по пладне беше за 91 цент повисока отколку на затворањето на тргувањето на крајот на минатата недела и изнесуваше 81,98 долари. На американскиот пазар барелот се тргуваше по повисока цена од 1,05 долари, од 78,12 долари.
Порастот на цените на нафтата ја одразува сè потесната понуда, со оглед на намаленото производство во Саудиска Арабија и истовремено благо зајакнување на сезонската летна побарувачка за бензин и авионско гориво, објаснуваат во белешката аналитичарите на Citi Research.
Покрај намалената понуда, аналитичарите посочуваат и нови кинески стимулации за економијата, кои очекуваниот пораст на каматните стапки во САД и во еврозоната го ставија во втор план.
Кинеската државна агенција за економско планирање во понеделникот ги откри мерките за поттикнување на приватните инвестиции во инфраструктурата и додаде дека исто така ќе ја зајакне финансиската поддршка за приватни проекти.
Учесниците на пазарот очекуваат Пекинг да користи насочени мерки за да ја поддржи нестабилната економија, што веројатно ќе ја зголеми побарувачката за нафта.
Инвеститорите веќе ја вклучија во цените проценката дека американската ФЕД и Европската централна банка (ЕЦБ) ќе ги зголемат каматните стапки за четвртина процентен поен на овонеделниот состанок.
Зголемените трошоци за задолжување веќе ги ограничија инвестициите и го зајакнаа доларот, што ја прави нафтата поскапа за купувачите на други валути и ја намалува побарувачката.
„Цените може да варираат на краток рок поради уште едно зголемување на стапката на ФЕД оваа недела, но очекуваме позасилена понуда поради намаленото производство на ОПЕК и зголемените пазарни шпекулации за нови кинески стимулации за поддршка на нивниот раст во третиот квартал“, пишуваат аналитичарите од Националната австралиска банка.
Организацијата на земјите извознички на нафта (ОПЕК) одделно објави дека цената на барел од нафтената кошничка на нејзините членки во петокот пораснала за 71 цент на 81,99 долари.
