Најмалку 90 луѓе загинаа, а 300 се ранети во нападот што се случи во саботата во хуманитарната зона во областа Ал Маваси, недалеку од Кан Јунис. Станува збор за напад извршен од израелски сили, чија цел, како што беше речено, бил високиот командант на Хамас, Мохамед Деиф. Сепак, нема официјална потврда или доказ дека е убиен, како што изјави самиот израелски премиер Бенјамин Нетанјаху.
Инаку, ова е еден од најсмртоносните напади од почетокот на конфликтот меѓу Израел и Хамас, а Би-би-си пренесува податоци од Министерството за здравство во Газа во кое се наведува дека загинале дури 141 Палестинец, а околу 400 повеќе луѓе беа повредени.
Хамас ги отфрла тврдењата дека Деиф воопшто бил во областа, наведувајќи дека „овие лажни тврдења се само прикривање на размерите на ужасниот масакр“, пренесува АП. Имено, нападот се случил во област која израелската армија ја одредила како безбедна зона за илјадници Палестинци.
Што вели Израел, а што Хамас?
Очевидец од областа Ал Маваси изјави за Би-Би-Си дека сè изгледало како земјотрес. BBC Verify ги анализираше снимките од последиците од нападот, потврдувајќи дека тој се случил во област означена како хуманитарна зона на веб-страницата на израелските одбранбени сили (ИДФ).
Сведоците го опишуваат нападот како со неколку удари, а новинарите на АП изброиле повеќе од 40 тела во преполната болница Насер во близина.
Голем број жртви сѐ уште се под урнатините и на патиштата, а како што соопшти локалното Министерство за здравство, екипите за итна помош и цивилна заштита не можат да дојдат до нив.
На друго место, Агенцијата за цивилна одбрана на Газа, управувана од Хамас, соопшти дека 17 лица биле убиени во вториот израелски напад во саботата. Се вели дека цел на нападот бил сала за молитва во бегалскиот камп Шати западно од градот Газа. Израелската војска допрва треба да го коментира тврдењето.
Официјален претставник на Хамас, цитиран од Ројтерс, ги нарече нападите „сериозна ескалација“ што покажа дека Израел не е заинтересиран за постигнување договор за прекин на огнот. Преговорите во Катар и Египет завршија без успех во петокот, јави Би-би-си.
На прес-конференција во саботата, Нетанјаху рече дека наредил операцијата Ал Масави да продолжи откако бил информиран од безбедносните сили. Тој рече дека сака да знае дека наоколу нема заложници, колкава е колатералната штета и какво оружје ќе се користи.
Тој, исто така, рече дека двајцата насочени лидери на Хамас не може да се потврди дека се мртви, но вети дека ќе го искорени раководството на групата.
„Во секој случај, ќе дојдеме до целото раководство на Хамас“, рече Нетанјаху.
Лидерот на Хамас Исмаил Ханије, цитиран од АФП, подоцна го обвини Нетанјаху дека се обидува да го блокира примирјето со „грозоморни масакри“. Хамас рече дека тврдењето дека неговите водачи биле мета е „лажно“.
„Не е првпат Израел да тврди дека цели на палестински лидери, за подоцна да се покаже како лага“, се вели во соопштението на групата.
Зборувајќи за Би-би-си, д-р Мохамед Абу Раџа, кој се наоѓа во болница каде ги лекува повредените, рече дека повеќето од повредените претрпеле повеќекратни рани од шрапнели. Тој исто така рече дека меѓу жртвите има и цивили, особено жени и деца.
Кој Мохамед Деиф?
Мохамед Деиф, шефот на военото крило на Хамас, Бригадите Ал Касам, е еден од најбараните луѓе во Израел.
Тој има речиси митски статус во Газа, откако избегна фаќање и преживеа неколку обиди за атентат, вклучително и во 2002 година кога изгуби око.
Израелските власти го затворија во 1989 година, по што формираше бригада со цел да ги фати израелските војници.
Израел го обвинува дека планирал и надгледувал бомбашки напади во автобуси во кои загинаа десетици Израелци во 1996 година и за учество во апсењето и убиството на тројца израелски војници во средината на 1990-тите.
Се верува дека тој бил еден од организаторите на нападот на Хамас на 7 октомври, кога беа убиени околу 1.200 Израелци и странци – главно цивили, а 251 лице беа одведени во Газа како заложници.
Ова доведе до голема израелска воена операција во Газа во која загинаа повеќе од 38.400 Палестинци, според Министерството за здравство на Хамас.
