Американската потпретседателка и кандидат на демократите Камала Харис изјави денеска, по убиството на лидерот на Хамас, Јахја Синвар, дека овој момент нуди шанса да се стави крај на војната во Појасот Газа.
„Правдата е задоволена. Синвар е одговорен за убиството на илјадници невини луѓе, вклучувајќи ги и жртвите на 7 октомври и заложниците убиени во Газа“, рече Харис.
Таа изрази надеж дека наскоро ќе започне „ден потоа без Хамас“ на власт во палестинската енклава, пренесува Ројтерс.
Харис, исто така, истакна дека војната во Газа резултирала со поголема нестабилност на Блискиот Исток.
Демократката повтори дека „Израел има право да се брани“ и повика на ослободување на заложниците од Газа.
„Страдањето мора да заврши“, заклучи Харис.
Израелскиот министер за надворешни работи Израел Кац, премиерот Бенјамин Нетанјаху, ИДФ и Шин Бет вечерва потврдија дека Синвар бил убиен во средата во јужниот дел на Газа, но Хамас допрва треба да даде изјава.
Израел вршеше проверки во текот на денот, вклучително и ДНК тестови, за да утврди дали Синвар е меѓу неколкуте убиени Палестинци.
Синвар е роден во Кан Јунис и беше избран за лидер на Хамас во Газа во 2017 година.
Тој беше назначен за политички лидер на таа милитантна палестинска група на почетокот на август, по атентатот на лидерот Исмаил Ханије во Техеран.
Синвар (61) стои зад нападот врз Израел на 7 октомври минатата година, бидејќи израелската армија го бараше во енклавата.
Тој помина 23 години во израелските затвори пред да биде ослободен во 2011 година во размена на затвореници.
