Секојдневно посетителите на Рим фрлаат по околу 3.000 евра во монети во Фонтаната Треви, една од најпрепознатливите знаменитости на главниот град на Италија, така што оваа фонтана годишно „заработува“ повеќе од милион евра, пишува Нова економија.
Изградена помеѓу 1732 и 1762 година, Фонтаната Треви, дизајнирана од Никола Салви, е една од најпознатите знаменитости во Рим.
Според традицијата, посетителите треба да застанат со грб кон споменикот и да фрлат паричка преку левото рамо со десната рака во водата, што гарантира враќање во „вечниот град“.
Ритуалот „фрлање паричка“ стана познат благодарение на филмот „Три парички во фонтаната“ од 1954 година.
Неколку пати годишно, градот Рим испраќа тим од работници да собере вистинско мало богатство од фонтаната.
Работниците користат четки на краевите на долгите столбови за прво да ги изметат монетите во купови, а потоа со црево да ги извлечат парите од купот. Монетите потоа се чуваат под будното око на полицијата.
Во 2001 година, градоначалникот на Рим одлучил парите кои завршуваат во фонтаната да бидат дадени на локална добротворна организација, со цел да се запрат честите обиди на луѓето да ги украдат монетите.
Оттогаш, секоја година „ситните парички“ од Фонтаната Треви се донира на Римокатоличката хуманитарна организација Каритас (Каритас).
За таа организација парите што ги добива од фонтаната се огромен поттик и сочинуваат 15 отсто од нејзиниот годишен буџет.
Парите потоа се користат за помош на сиромашните, за финансирање народни кујни, засолништа за бездомници, бесплатни супермаркети и други проекти.
Парите се наменети и за одржување на комплексот на периферијата на Рим во кој се сместени дом за стари лица, менза и стоматолог за жителите на градот кои живеат во сиромаштија.
