Ураганот Берил денеска го погоди брегот на полуостровот Јукатан во Мексико во близина на туристичкиот град Тулум. Иако сè уште не се пријавени смртни случаи или повредени, речиси половина од Тулум е без струја, рече Лаура Веласкез, координаторка на мексиканската цивилна заштита, пренесува АП.
Националната комисија за води на Мексико соопшти дека областа ќе биде погодена од обилни врнежи и поплави во наредните часови.
Националниот центар за урагани соопшти дека Берил ќе се упати кон северно Мексико во близина на границата со Тексас, па градските власти на Корпус Кристи поделиле 10.000 вреќи со песок за помалку од два часа, а 14.000 во средата.
Претходно денеска властите ги повикаа туристите во мексиканското летувалиште Тулум да ги напуштат плажите и да бараат засолниште, а хотелите беа евакуирани. Во четвртокот доцна навечер, центарот на невремето се наоѓал на 220 километри од Тулум и се движел во правец на градот со брзина од 26 километри на час, соопшти центарот за урагани, јави Танјуг.
