Русија и Украина тајно водат мировни преговори преку високи воени лидери, изјави американскиот новинар и добитник на Пулицеровата награда Симон Херш.
Како што наведе тој, тој дијалог добива на интензитет и покрај приговорите на украинскиот претседател Володимир Зеленски и Белата куќа.
Во написот објавен на платформата Сабстек, тој напиша дека прашањето за можното определување на нови граници долж сегашните линии на фронтот меѓу Украина и Русија може да се реши за Русија да го задржи Крим и териториите на самопрогласената Луганска Народна Република и Доњецката Народна Република, како и областа Херсон и Запорожје, додека за возврат Украина би станала членка на НАТО, со голем број одредени ограничувања.
„Сериозните мировни преговори меѓу Русија и Украина одеднаш се забрзаа, но нивната главна движечка сила не е ниту Вашингтон, ниту Москва, ниту Бајден, ниту Путин, туку двајца високи генерали – началникот на рускиот Генералштаб Валериј Герасимов и командантот на вооружените сили на Украина Валери Залужни“, вели Херш.
Херш тврди дека во замена за територијата се разгледува опцијата Русија наводно да не се противи на евентуалниот влез на Украина во НАТО, но со јасен услов Алијансата таму да не ги стационира своите војници и офанзивно оружје.
Тој додава дека Белата куќа е „целосно против предложениот договор“. Како друга можна пречка, американскиот новинар го наведува инсистирањето на украинскиот претседател Зеленски Украина „да излезе победник“ од војната.
Херш наведува дека американски функционер рекол дека Зеленски бил свесен дека не тој, туку војската ќе го реши овој проблем и дека преговорите ќе продолжат со или без него, и му рекол дека ако е потребно, на Зеленски ќе му биде „платен пат на Карибите”.
