Турските безбедносни претставници денеска соопштија дека опозициските сили поддржани од Турција се блиску до преземање на контролата врз градот Манбиџ од силите поддржани од САД и од Курдите.
Опозициската група, позната како Сириска национална армија (СНА), сега контролира 80 отсто од Манбиџ по судирите со сириските курдски Единици за заштита на народот (ИПГ), соопштија официјални лица.
Минатата недела, силите поддржани од Турција на сличен начин протераа борци на ИПГ од градот Тал Рифаат.
Силите на сириските Курди се клучен сојузник на САД во борбата против Исламската држава во Сирија. Турција, сепак, ја смета ИПГ за терористичка организација поради нејзините врски со забранетата Курдистанска работничка партија (ПКК), која водеше децениски бунт во Турција.
Турција изврши неколку упади во Сирија од 2016 година за да ги истера ИПГ од нејзините граници со Сирија.
