Училиште во турскиот град Малатија кој беше еден од погодените градови од катастрофалниот земјотрес во Турција, што се случи во февруари годинава ќе го носи името Македонија, а 32 училници колку што ќе има ќе носат имиња на градови во нашата држава.
Од Црвениот крст соопштија дека по направените преговори со Турската Црвената Полумесечина, на заеднички предлог е одлучено собраните хуманитарни средства за помош на настраданото население од земјотресот во Турција и Сирија во износ од 50.909.796 денари, да се наменат за изградба на училиштето во Малатија.
– Овој акт ќе остави траен белег и доказ за солидарноста на граѓаните на РСМ кон граѓаните на Република Турција. За текот на градбата на училиштето и инвестицијата, граѓаните и пошироката јавност, повремено ќе може се информираат на нашата интернет страница – нагласија од Црвениот крст.
Оттаму додаваат дека во хуманитарната акција вкупно биле собрани 63.380.807 денари. Од нив, 12.427.334 денари, се испратени на сметката за Меѓународната федерација на Црвениот крст и Црвената полумесечина, за помош на настраданото население во Сирија.
