Илјадници британски туристи секоја година одат на шпанскиот остров Тенерифе. И ова лето, поточно три недели се пишуваше за 19-годишниот Џеј Слејтер, кој по ноќно излегување заврши во изнајмен стан со двајца мажи во близина на националниот парк Рурал де Тено, по што му се губи трагот.
Според Дејли Мејл, тинејџерот се забавувал со своите пријатели во клубот на плажа „Papagayo in Playa de las Americas“, каде се одржувал фестивалот NRG. Потоа се вратил во сместувањето во Airbnb со осудениот дилер на дрога, Ајуб Касим, и уште еден мистериозен човек. Младиот човек не е виден од утрото на 17 јуни. Споменатиот Airbnb го напуштил утрото, околу 8 часот, кога пеш тргнал кон неговото сместување бидејќи немало автобус. Околу 8 часот и 50 минути и се јавил на својата пријателка и ѝ рекол дека „телефонот му е на еден процент батерија и дека е изгубен и жеден“.
Касим (31) е еден од последните луѓе што го виделе Џеј, но шпанската полиција го смета за „неважен“ за истрагата. Касим во 2015 година беше осуден на девет години затвор за трговија со дрога во Велс. Полицијата и спасувачките тимови на планина, со помош на кучиња, дронови и хеликоптери, 13 дена го бараа Џеј во долината Маск, каде последен пат му заѕвони телефонот, но потрагата беше прекината на 30 јуни.
А Дејли Мејл сега откри дека немилосрдните британски дилери се борат со италијанската мафија за контрола на трговијата со дрога во Тенерифе, предизвикувајќи стравувања дека Џеј некако е вовлечен во мрачниот подземен свет. Италијанските криминални групи како мафијата, Камора и Ндрангета долго време ја контролираат профитабилната трговија со дрога на островот. Експертите на бандата велат дека Италијанците во минатото соработувале со локални криминалци за шверц на кокаин во Европа од Латинска Америка, често користејќи ги Канарските острови како појдовна точка за илегални пратки.
Но, сега бандите од Лондон, Манчестер и Ливерпул почнаа да се пробиваат до Тенерифе, додека италијанските конкуренти се повеќе се свртуваат кон имотите и зградите за да ги перат своите пари. За жал, Џеј Слејтер се приклучи на долгата листа на луѓе кои исчезнаа во Тенерифе со текот на годините – од кои многумина последен пат беа видени во одморалиштето Плаја де лас Америкас. Инаку, ова е 11-та личност која исчезнала на островот за само шест месеци.
Мариел Гонзалес Гутиерез и Себастијан Кобос Гонзалес
Жена од Мексико (27) и нејзиниот двегодишен син исчезнаа на 21 март во Санта Круз де Тенерифе. Здружението СОС Десапаресидос соопшти дека истражува можен случај на киднапирање деца. Исто така, се стравува дека момчето повеќе не е на шпанска национална територија. Дополнително, шпанскиот весник „Ел Еспањол“ објави дека судијата наредил одземање на пасошот на Себастијан додека неговите родители се расправале за старателството, откако претходно била донесена одлука за заедничко старателство.
Марк Френсис Олбрехтс
Наводно, белгиски државјанин, 71-годишниот исчезнал на 24 април. Последен пат е виден во Адеје во југозападниот дел на Тенерифе. Локалниот весник Canarian Weekli објави дека сопругата на Марко, 66-годишната Лаура Гастон, била пронајдена од страна на рибар кој плови во близина на брегот на Тенерифе во близина на Арико. Над главата имала торба, а според извештаите и недостасувале едната рака и двете нозе.
По смртта на Лаура беа уапсени три лица – две во Белгија и едно во Тенерифе.
Марек Сидлецки
Полскиот државјанин исчезна на 14 јуни, три дена пред Џеј Слејтер. Се вели дека тој бил упатен кон Ланзароте, од каде имал намера да се врати дома во Полска.
Полските медиуми јавуваат дека Марек пловел на својот брод Наутис и последен пат бил виден на вода.
„По неколку телефонски разговори со искусни морнари, се сомневаме дека откажале струјата и воланот, поради што јахтата плутала без можност да пристигне на кое било пристаниште“, вели синот на Марек, Пшемислав.
Ноелија Хернандез Мартин
Ова седумнаесетгодишно девојче исчезна на 23 јануари во Сан Кристобал де Ла Лагуна на северот на Тенерифе.
Марек Ј.
51-годишен маж исчезна на 8 јуни од Ваљермоса, село во Ла Гомера. Тој е висок околу 180 см и тежок 80 кг.
Хуан Кабрера Гонзалес
60-годишникот бил пријавен за исчезнат на 13 јануари. Последен пат е виден во Ла Оратава. Има седа коса и кафени очи. Во моментот на неговото исчезнување, мажот носел сина тренерка со бела лента и чизми со метални патенти.
Раико Гарсија Дијаз
44-годишникот исчезна на 15 март во Баранко Хондо-Канделариа, Тенерифе. Беше кажано дека во тоа време возел сребрен Форд КА.
