Во Иран ќе се одржи вториот круг од претседателските избори меѓу реформскиот кандидат Масуд Пезешкијан и ултраконзервативниот Саид Џалили, потврди денеска изборниот претставник врз основа на прелиминарните резултати.
Претседателските избори одржани во петокот беа набрзина распишани по смртта на конзервативниот претседател Ебрахим Раиси (63) во хеликоптерска несреќа на 19 мај.
Портпаролот на изборното тело Мохсен Еслами денеска ги соопшти прелиминарните резултати на прес-конференција што ја пренесува иранската државна телевизија. Според нив, ниту еден од кандидатите не ги добил потребните повеќе од 50 отсто гласови за победа во првиот круг, па вториот круг ќе се одржи меѓу двајцата водечки кандидати.
Еслами рече дека од 24,5 милиони преброени гласови, пратеникот Пезешкијан освоил 10,4 милиони гласови (42 отсто), а поранешниот нуклеарен преговарач Џалили освоил 9,4 милиони (38 отсто). Портпаролот на парламентот Мохамад Багер Калибав доби 3,3 милиони, а шиитскиот свештеник Мостафа Пурмохамади доби повеќе од 206.000 гласови.
„Ниту еден од кандидатите не освои апсолутно мнозинство гласови и затоа првиот и вториот кандидат ќе одат во вториот круг на 5 јули“, изјави Еслами за новинарите.
Според правилата, доколку ниту еден од кандидатите не добие повеќе од 50 отсто од гласовите, водечките двајца кандидати ќе се квалификуваат во вториот круг.
Од 14 претседателски избори организирани од 1979 година, само еден е одлучен во вториот круг, во 2005 година, пишува Франс прес.
На изборите на кои право на глас имаа 61 милион гласачи учествуваа четворица кандидати, тројца конзервативци и еден реформатор.
На почетокот на јуни, Советот за чувари на исламската револуција одобри шест кандидати да учествуваат на изборите, но двајца од нив се откажаа од трката еден ден пред гласањето.
Внимателно се следат изборите во Иран, важна азиска земја во центарот на геополитичките кризи, од војната во Газа до нуклеарното прашање, во кое се спротивставува на западните земји.
