Израелските власти побараа од Меѓународниот кривичен суд да не издава налози за апсење на високи израелски функционери и рекоа дека ќе продолжат да се борат.
– Очекуваме судот (МКС) да се воздржи од издавање налози за апсење на високи израелски политички и безбедносни функционери. Ова нема да нѐ одврати, нема да ја наведнеме главата и ќе продолжиме да се бориме – изјави министерот за надворешни работи, Израел Кац, пренесе Ројтерс.
Тој ги предупреди израелските амбасади да ја зајакнат безбедноста поради ризикот од „бран антисемитизам“.
Израел и САД прават дипломатски напори да го спречат Меѓународниот кривичен суд да издаде налог за апсење на премиерот Бенјамин Нетанјаху и други израелски функционери поради војната во Газа, објавија израелските медиуми.
Како што е наведено, Нетанјаху е загрижен дека таквиот потег може да му наштети на угледот на Израел на меѓународната сцена и е во контакт со претставници на администрацијата на американскиот претседател Џозеф Бајден.
Нетанјаху во петокот рече дека претстојните одлуки на МКС би можеле да станат „опасен преседан“, но дека позицијата на Израел не се менува.
Главниот обвинител на МКС, Карим Кан, за време на посетата на регионот во декември рече дека истрагата „напредува, со строгост, решителност и со инсистирање да не дејствуваме врз основа на емоции, туку врз основа на цврсти докази“.
Хаарец објави дека израелската влада претпоставува дека Кан наскоро ќе издаде налози за апсење на премиерот, министерот за одбрана Јоав Галант и началникот на Генералштабот на армијата, Херзи Халеви.
Израел и САД не ја прифаќаат јурисдикцијата на МКС, но налогот за апсење ќе ги спречи израелските функционери да патуваат во повеќе од 120 земји и ќе им отежне на западните демократии да соработуваат со Тел Авив, рече Метју Гилс, професор по право на Универзитетот во Есекс.
Ројтерс потсетува дека има посебен случај против Израел за геноцид пред Меѓународниот суд на правдата.
