Еквадорската полиција денеска соопшти дека 49 жртви на киднапирање се спасени од криминалната банда Лос Лобос во рударскиот регион во јужната провинција Азуај.
„Четириесет и девет граѓани кои беа жртви на киднапирања во рударски области се ослободени, а две лица поврзани со ова злосторство се уапсени“, соопшти еквадорската полиција на платформата Х (Твитер), пренесе Ројтерс.
Во претходното соопштение на вооружените сили беше наведено дека се спасени 46 лица и дека се пронајдени уште пет безживотни тела, од кои четири се распарчени.
Еквадор се бори со зголеменото насилство, што го натера претседателот Даниел Нобо неколку пати да прогласи вонредна состојба за време на која воените сили патролираа по улиците и ги обезбедуваа затворите.
Тој, исто така, назначи 22 криминални групи како терористички групи.
