Претстојната зима ќе биде предизвикувачка во делот на енергетиката, затоа што се очекува зголемување на цената на електричната енергија на берзите во Европа, поради случувањата во Украина, изјави премиерот Христијан Мицкоски и додаде дека, како држава, сме подготвени и дека ќе одговориме на сите предизвици.
– Имам чувство дека оваа зима ќе биде прилично предизвикувачка, не поради температурите, туку поради состојбата што се случува во Украина, каде што комплетно е уништен електроенергетскиот систем и Украина влече енергија од Европа, што значи дека тоа ќе ја зголеми цената на електричната енергија на берзите во Европа и ќе ја намали количината, така што ние мораме да бидеме подготвени – нагласи Мицкоски, додавајќи дека очекува енергетска криза, во одредена смисла, во Европа.
Мицкоски уверува дека работењето во АД ЕСМ е нормализирано, иако компанијата наследила долг од пет милијарди денари и најави дека многу скоро ќе има одговорност за оние што ја оставиле компанијата во таква состојба.
– Бидете сигурни дека е нормализирано работењето на компанијата и ќе има одговорност за тоа што се случувало, но нема да правиме естрада и театар од тоа. Многу скоро од денеска, ќе бидат посочени лицата што се виновни за состојбата во која е оставена компанијата – рече Мицкоски.
Според информациите со кои располага, рече дека долгот за увоз на јаглен е околу милијарда и пол и дека по направените преговори со компаниите, добиено е намалување на фактурите приближно од пет милиони евра, додека по основ на ископ на јаловина и на јаглен, затечени се долгови од две милијарди денари. Хидрологијата, како што посочи, е речиси празна, односно некаде на 24-25 проценти, а не се направени ниту редовните ремонти.
Во однос на изјавата на претседателката на Организацијата на работодавачи на Македонија, Владанка Трајкоска, дека имале големи очекувања, но дека во првите 100 дена од работата на Владата не е ништо направено, премиерот рече дека бил изненаден од ваквата изјава.
– И јас се изненадив и им се јавив на некои од бизнисмените и коморите, и тие имаат спротивен став. Добро е да ги прашате стопанските комори да ви дадат став, а и добро е да прашате зошто претседателката на ОРМ имаше таква позиција без да консултира никого од работодавците – рече Мицкоски.
Претседателката на ОРМ во вторникот изјави дека очекувале Владата да има чувство за нивните проблеми со кои се соочуваат во текот на работењето, како што се зголемување на продуктивноста, немањето работна сила и инфраструктура.
– Она што го очекувавме беа многу високи очекувања, но не добивме речиси ништо. Очекувавме дека оваа Влада ќе има „сенс“ за бизнисот, за сите оние кризи со кои се соочуваме, меѓутоа она што се зборуваше во изминатиот период беше само зголемување на платите на јавната администрација, земање кредити за општините, заобиколување на проблемите со кои се соочува стопанството во делот на продуктивноста и немање работна сила, што значи, со еден збор, ништо – изјави Трајкоска.
