Ако им се верува на одредени медиуми, Лионел Меси е сè повеќе и повеќе незадоволен од раководните лица на каталонскиот гигант Барселона, а има и такви кои шпекулираат дека Аргентинецот планира да ја промени клупската средина за време на летниот преоден рок.
Англиските медиуми веднаш ја лансираа и приказната дека актуелниот шампион во Премиер лигата, Манчестер Сити, е сериозно заинтересиран за услугите на Меси и тоа поради добриот однос кој го има со Пеп Гвардиола, но поранешниот фудбалер на Арсенал и Барселона, Емануел Пети, смета дека тоа не е добар потег.
- Искрено, мислам дека Меси не би можел да се навикне на интензитетот во Премиер лигата. Не сака кога некој игра дефанзивно, кога некој му дише во врат, а во Шпанија ја има и судиската заштита. Знам дека навивачите сакаат да го видат во дресот на Сити, но јас не гледам ниту една причина поради која Сити треба да одвои толку голема парична сима за неговото обесштетување затоа што ќе има 32 или 33 години, изјави Пети и додаде:
- Ако го сака Сити, тоа требаа да го направат пред три години. Сега е доцна. Меси не е машина како Кристијано Роналдо, кој доминира иако има 35 години. Роналдо е животно, а Меси во своите нозе има уште две години на највисоко можно ниво. Убеден сум дека и Меси знае дека му се ближи крајот, изјави Французинот.
