Во невремето што во саботата и неделата го зафати Крим, четири лица загинаа, а десетици се повредени откако ураганските ветрови и големите поплави ги преплавија јужните руски региони долж брегот на Црното Море.
Како што јави агенцијата ТАСС, циклонот продолжува да се движи над оваа област. Надлежните служби ги предупредија граѓаните дека се очекуваат урагански ветрови и дожд со снег. Спасувачите цела ноќ ги евакуирале луѓето од поплавените куќи.
Советникот на лидерот на Крим, Олег Кријучков, соопшти дека речиси половина милион жители на полуостровот останале без струја.
„Ураганските ветрови до 40 метри во секунда корнат дрвја и уништуваат покриви. Многу области на Евпаторија се поплавени, а јавниот транспорт е запрен во Севастопол. Невремето стигна до Русија: најсилните ветрови беснеат во Анапа и Краснодар“, се наведува во соопштението.
Антон Герашченко, советник на министерот за внатрешни работи на Украина, тврди дека невремето ја однело руската одбрана ископана на плажите на полуостровот.
„Бурата ги однесе рововите на окупираниот Крим што руската армија ги ископа на плажите“, напиша Герашченко на Ксу. „Според информациите од кримските медиуми, во Евпаторија водата ја однела одбранбената линија на брегот“, додаде тој.
