Се подготвува сензационален кам-бек на Меси во Европа!

Интер одигра добро во регуларниот дел од сезоната и беше убедливо прв во Источната конференција, па јасно беше дека Лионел Меси и друштвото се главните фаворити за освојување на титулата во американската МЛС лига.

Сепак, клубот од Мајами се сопна на првата пречка во плеј-офот, откако по три натпревари Атланта Унтиед успеа да ги победи и да се пласира во следната рунда, што беше навистина огромно изненадување.

Така, Аргентинецот и соиграчите се на одмор од 10 ноември, кој ќе трае до крајот на јануари, кога ќе започнат подготовките за новата сезона во МЛС.

Меси веќе одлучи да помине извесно време во татковината со семејството, а се очекува дел од одморот да го помине и во Барселона.

Сепак, најдобриот играч на сите времиња се најде во центарот на вниманието бидејќи се појавија шпекулации за неговото сензационално враќање во Европа и дека Меси може повторно да се види на најголемата сцена веќе во јануари.

Медиумите во Англија почнаа да шпекулираат дека Меси би можел да дојде на позајмица во Манчестер Сити откако Пеп Гвардиола јавно почна да се жали дека му треба фудбалер кој има вистинска визија на теренот и кој знае што да прави со топката.

Се шпекулираше дека Меси би можел да биде решението бидејќи Сити може да го донесе на позајмица на почетокот на годината и да го направи она што го направија Милан и ПСЖ со Дејвид Бекам.

Тогаш Бекам доаѓаше во Европа од МЛС на позајмица која траеше три-четири месеци и доста добро играше за Милан и ПСЖ.

Таква опција на маса има и Меси и сигурно е дека Интер не би му правел проблеми, а за Гвардиола таков фудбалер би бил засилувањето за кое сонува бидејќи и самиот знае за каков играч се работи, со оглед на тоа дека заедно работеа во Барселона.

Сепак, прашање е дали Меси е заинтересиран за ваков потег. Неговата форма не е под знак прашалник бидејќи оваа сезона одигра без проблеми за клубот и за репрезентацијата, но прашање е дали е подготвен да се врати на највисоко ниво.