Еден ден откако Нермин Сулејмановиќ уби три и рани уште три лица, жителите на Градачац се уште се во шок. Во Градачац денеска почнува тридневна жалост, а знамињата се спуштени на половина копје.
Екипата N1 разговараше со неколку граѓани од овој град кои велат дека не паметат слични настани.
„Градачац е нормално мирен град. Порано немаше такви инциденти“, вели еден случаен минувач.
Еден граѓанин вели дека го познавал напаѓачот.
„Тој беше лош човек“, додаде тој.
Тој и претходно се заканувал дека ќе убие
Еден случаен минувач верува дека такви работи може да се спречат.
„Полицијата направи што можеше. Полицијата не прави закони, некој друг го прави тој закон, а тој закон е непостоечки“, рече тој и додаде дека површно го познавал напаѓачот.
„Тој секогаш беше проблематичен, тоа сите го знаат. Тој се заканувал дека ќе убие пред 10, 15 години. И тоа се случи сега“, вели тој.
И новинарите од тој град сведочат дека Сулејмановиќ од порано бил познат како насилен и проблематичен.
„Учествуваше во многу инциденти во последните 10-15 години, но немаше позначајни инцидентни ситуации во последните 2-3 години. Тој се посвети на спортот, одеше на натпревари и постигнуваше значајни резултати, но меѓу неговите сограѓани имаше страв од неговото однесување и повеќето избегнуваа да се дружат со него“, изјави вчера новинарот на локалното радио Џевад Пашалиќ за N1 БиХ.
Досие – од трговија со дрога до семејно насилство
Потсетуваме, Нермин Сулејмановиќ во петокот ја убил поранешната сопруга, а потоа уште три лица. Тој ранил уште еден маж и жена на различни локации во Градачац. Сулејмановиќ ја убил сопругата пред камерите за време на директен пренос на социјалната мрежа Инстаграм. По полицискиот претрес тој бил лоциран на фарма каде потоа се самоубил пред очите на полицајците.
Обвинителството на кантонот Тузла потврди дека Сулејмановиќ имал пријави за семејно насилство, последната само три дена пред убиствата што ги извршил.
Покрај пријавите за семејно насилство, во досието на убиецот од Градачац има и апсење за дрога и обид за убиство. Тој за прв пат е приведен во Хрватска поради обид за шверц на 806 килограми марихуана. Исто така, тој бил поврзан со нарко групата на Емир Коџаг.
Во Градачац е прогласена тридневна жалост, додека граѓаните најавуваат протести.
