Седумдесет отсто од даночните обврзници платиле во законскиот рок

Во текот на декември, даночните обврзници успешно ја исполнија својата обврска за плаќање на данокот на личен доход, социјалните придонеси и ДДВ, што е одраз на одговорни даночни обврзници и усогласеност со законските обврски, соопшти Управата за јавни приходи.

Во однос на бруто-платата за ноември 2024 година, 70,650 работодавци имале обврска да исплатат плати и социјални придонеси за 552.030 вработени лица.

Во законскиот рок до 16 декември, 49,911 или 71% од работодавците ја исполниле обврската и исплатиле бруто-плати и социјални придонеси за 482.276 од вработените лица.

Ова значи дека за 87 % од вработените во државата социјалните придонеси се уплатени навремено.

Овој резултат покажува одговорност и посветеност на работодавците со цел исполнување на даночните обврски навреме, што има директен позитивен ефект и врз социјалната сигурност на работниците.

Што се однесува до обврските за ДДВ, 98,7 % од регистрираните месечни ДДВ-обврзници навремено ги поднеле даночните пријави за месечниот период од 1 до 30.11.2024 година.

Од вкупно 7.284 даночни обврзници, 4.025 во даночните пријави пријавиле даночен долг за ДДВ и имале обврска за уплатат 3,399,369,827 денари, од кои 70 % или 2,811 од даночните обврзници навремено ги исполниле своите обврски, при што уплатиле 78 % од вкупно пријавениот долг, односно уплатиле вкупно 2,652,711,966 денари.

За даночните обврзници што не ги платиле даночните обврски во законскиот рок, Управата за јавни приходи редовно постапува согласно со дадените законски овластувања, со мерки за глоба за неподнесена даночна пријава и присилна наплата на неплатениот даночен долг.

– Промовирајќи култура на позитивни односи со даночните обврзници, Управата претходно им доставува известувања на сите што задоцниле, со потсетување доброволно да ги платат достасаните даночни обврски, а потоа доставува опомени согласно со закон и спроведува присилна наплата од паричните средства на сметката во банка (блокада на сметка) – додаваат од УЈП.

Целта на Управата за јавни приходи е да постигне висок степен на навремено исполнување на даночните обврски како показател за ефикасно собирање на даночните приходи, поради што дејствува проактивно и превентивно, пренесувајќи соодветни пораки до јавноста и до секој даночен обврзник.