Сателитските снимки откриваат дека Северна Кореја ископала најмалку два големи ровови преку патишта и железници на границата со Јужна Кореја.
Тензиите меѓу двете Кореи се најсилни во последниве години, бидејќи севернокорејскиот лидер Ким Џонг Ун постојано покажуваше нуклеарно оружје и ракетни програми, додека на Русија и даваше муниција, а сега и војници за поддршка на војната во Украина.
Ким вети дека ќе ги прекине врските со Сеул и ќе ја напушти својата долгогодишна цел за помирување со Јужна Кореја, чија конзервативна влада зазеде тврд став против нуклеарните амбиции на Северот. Сателитските снимки направени од „Planet Labs PBC“ покажуваат ров и железничка линија што минува низ западниот дел на демилитаризираната зона меѓу двете Кореи.
Се верува дека работата на рововите започнала набргу откако Северна Кореја урнала пат на 15 октомври во близина на Каесонг, пограничен град на западот на земјата.
Западниот ров се наоѓа во близина на сега затворениот фабрички комплекс Каесонг кој симболизира ера на зближување, бидејќи фабриките беа заеднички управувани од двете земји додека Сеул не ги затвори во 2016 година поради нуклеарната проба на Северна Кореја.
На местото на ровот можеа да се видат некои возила. Слична ситуација е забележана и на преминот меѓу двете земји долж источниот брег на Корејскиот полуостров.
Аналитичарите на веб-страницата 38North фокусирана на Северна Кореја велат дека работата започнала речиси веднаш откако Северна Кореја ги уништила патиштата и железниците. Нивната проценка е дека западниот ров е долг околу 125 метри и широк околу седум метри.
Северна Кореја денеска истрела пробна интерконтинентална балистичка ракета за прв пат по речиси една година.
Ким го следеше лансирањето, нарекувајќи го „соодветна воена акција“ што ја покажува решеноста на Северна Кореја да одговори на потезите на нејзините непријатели кои ја загрозуваат нејзината безбедност, објавија државните медиуми.
