Египетскиот интернационалец Мохамед Салах, меѓу редови најави дека ќе продолжи да го носи дресот на англискиот премиерлигаш Ливерпул, чиј член е од 2017 година.
Брзоногиот напаѓач има валиден договор со „црвените“ до јуни следната година, а поради одредени понуди за кои се пишуваше, неговата лоша форма во вториот дел од сезоната, како и заминувањето на тренерот Јурген Клоп, се шпекулираше дека е можно напаѓачот да си замине од „Енфилд“.
„Не е никаква тајна дека во Ливерпул се бараат само трофеи и ќе направиме се за да ги освоиме и следната сезона. Нашите навивачи го заслужуваат тоа, а ние играчите ќе се бориме до крај да го оствариме тоа“, напиша Салах на социјалните мрежи навестувајќи дека има намера да остане во Ливерпул, каде дојде пред седум години од Рома.
Неодамна Салах имаше одредени конфликти со германскиот стручњак, но по повод неговото заминување Египјанецот остави емотивна порака на Инстаграм. „Беше одлично да ги споделам сите моменти, успеси и трофеи со вас во последните седум години“, напиша тој покрај фотографијата со Јурген Клоп.
Салах во Ливерпул одигра вкупно 250 првенствени натпревари и постигна 155 голови. Неговиот тим оваа сезона заврши на третото место во Премиер лигата, а Салах беше доведен во контекст на евентуална преселба во Саудиска Арабија, но сепак се одлучи да соработува со наследникот на Клоп, холандскиот стручњак Арне Слот.
