Извозот на руска нафта се зголеми за 50.000 барели дневно на 8,3 милиони барели дневно во април, што е највисоко ниво од почетокот на војната во Украина минатиот февруари, според податоците на Меѓународната агенција за енергија (ИЕА).
Испораките на сурова нафта во Русија се зголемија за 250.000 барели, неутрализирајќи го падот на извозот на нафтени деривати од 200.000 барели. Проценетите приходи од извозот на нафта се зголемија за 1,7 милијарди долари на 15 милијарди долари.
И покрај зголемувањето, приходите од извоз се за 27 отсто помали во однос на април минатата година. Руските даночни приходи од секторот нафта и гас се намалени за 64 отсто на годишно ниво.
Според проценката на ИЕА, Москва целосно не го спроведе најавеното намалување на производството на нафта за 500.000 барели.
Тие забележуваат дека руското производство на сурова нафта е непроменето на 9,6 милиони барели во април, а земјата треба да го намали производството за дополнителни 300.000 барели дневно во мај за да ги исполни прогнозите.
„Се чини дека Русија има мали потешкотии да најде купувачи за својата нафта и нафтени деривати, често на сметка на другите членки на ОПЕК +“, пишува агенцијата.
Ембаргото за увоз на руска сурова нафта во ЕУ стапи на сила во декември минатата година, а ембаргото на руските нафтени деривати во февруари годинава. Во исто време, ЕУ, заедно со групата Г7, воведе и ограничување на цената за сурова нафта и деривати што Русија ги извезува во трети земји.
Во исто време, ИЕА ја зголеми својата прогноза за овогодинешната светска побарувачка за нафта на рекордни 102 милиони барели дневно.
Така, прогнозата за годишната побарувачка на нафта е за 200.000 барели повисока од претходната прогноза. Во тој случај побарувачката на нафта ќе биде за 2,2 милиони барели поголема од минатогодишната побарувачка, објаснува агенцијата во извештајот објавен денеска.
Причина за поголемата побарувачка на нафта е отворањето на кинеската економија. „Закрепнувањето на побарувачката во Кина продолжува да ги надминува очекувањата, при што земјата постави рекорд од 16 милиони барели дневно во март“, се вели во извештајот.
