Русија го запре протокот на нафта во Полска преку нафтоводот Дружба, објави денеска Даниел Обајтек, извршен директор на полската рафинерија ПКН Орлен.
„Ефикасно ги обезбедуваме резервите. Русија го запре протокот кон Полска, за што сме подготвени. Само 10 отсто од суровата нафта доаѓа од Русија, а ние ќе ја замениме со други извори“, напиша Обајтек на Твитер.
ПКН Орлен најави дека може целосно да ги снабдува своите рафинерии преку море и дека прекинот на снабдувањето преку нафтоводот нема да влијае на испораката на бензин и дизел до потрошувачите.
Од февруари, по истекот на договорот со руски Роснефт, компанијата добива нафта како дел од договорот со руски Татнефт. Нафтоводот Дружба е изземен од санкциите што Европската унија ги воведе кон Русија поради нејзината инвазија на Украина.
Компанијата испорачува нафта за Полска, Германија, Унгарија, Чешка и Словачка. Беше изоставен од санкциите на ЕУ за да им помогне на земјите со ограничени алтернативи за снабдување со нафта. По почетокот на инвазијата на Украина и пред европското ембарго на руската нафта што пристигнува по море, полската рафинерија Орлен престана да купува руска нафта и гориво.
Во моментов набавува енергија од Западна Африка, Медитеранот, Мексиканскиот Залив и арапските земји. Од 2022 година Орлен има договор со Саудиска АРАМКО.
