Бројот на загинати од вирусот Марбург во Руанда се искачи на 11, соопштија денеска официјални лица, додека оваа источноафриканска земја продолжува да го истражува изворот на епидемијата што првпат беше откриена меѓу пациентите во здравствените установи.
Во владиното соопштение се наведува дека се евидентирани 36 потврдени случаи на зараза, од кои 25 се во строга изолација.
Руанда прогласи епидемија на 27 септември и пријави шест смртни случаи еден ден подоцна. Властите тогаш соопштија дека првите случаи биле откриени кај пациенти во здравствените установи и дека истрагата е во тек „да се утврди потеклото на инфекцијата“.
Изворот на инфекцијата останува нејасен неколку дена подоцна, што ги зголемува стравувањата од појава во малата централноафриканска земја. Изолацијата на пациентите и нивните контакти е клучна за запирање на ширењето на вируси како Марбург.
Најмалку 300 луѓе кои стапиле во контакт со оние за кои е потврдено дека имаат Марбург се идентификувани, а неодреден број сега се во изолација, според локалните здравствени власти.
На жителите на Руанда им беше побарано да избегнуваат физички контакт за да помогнат во спречувањето на ширењето. Повеќето од засегнатите луѓе се здравствени работници во шест од 30 области во земјата.
Како и еболата, се верува дека вирусот Марбург потекнува од лилјаци и се шири меѓу луѓето преку близок контакт со телесни течности на заразени лица или со површини, како што е контаминирана постелнина. Без третман, Марбург може да биде фатален кај 90 проценти од луѓето кои се заразени со болеста.
Симптомите вклучуваат треска, болки во мускулите, дијареа, повраќање, а во некои случаи и смрт од екстремна загуба на крв.
Првите случаи на вирусот се забележани во 1967 година во Германија во Марбург и Франкфурт и во Белград, тогашен главен град на Југославија, сега Србија.
Епидемии на Марбург вирусот и изолирани случаи биле пријавени во минатото во Танзанија, Екваторијална Гвинеја, Ангола, Конго, Кенија, Јужна Африка, Уганда и Гана, според СЗО.
