Властите на Франција и Монако соопштија дека е разбиена меѓународна криминална група со потекло од Балканот, која дејствувала во тие земји. Во рамките на операцијата на полицијата на две држави, на 3 октомври беа уапсени 17 лица, по што беа поднесени пријави против 11 лица, пренесува Фигаро. Тие се осомничени за трговија со оружје, дрога и перење пари преку лажни фирми.
Станува збор за прекршоци за кои е предвидена казна затвор од 10 години. Според Паризјен, меѓу членовите на криминалната група имало и српски државјани. Весникот пишува дека истражителите откриле дека главната улога во организациската шема на криминалната група ја имал Србинот Б.В. „кој се фалел со убивање и мачење луѓе“. При претресот полицијата запленила два пиштола, нешто повеќе од 19.000 евра во готовина, рачни часовници, како и блиндирано Ауди А8, јавува Танјуг.
Како што наведува БФМТВ, минатиот вторник беа уапсени 13 лица во Франција и уште шест во Монако како дел од голема полициска операција, која беше резултат на обемна и сложена истрага на Националната управа за борба против организираниот криминал.
Групата „падна“ благодарение на апликацијата „Скај ЕЦЦ“. Инспекторите ги снимиле разговорите разменети на оваа платформа, откривајќи криминална мрежа, основана на југоисточниот дел на Франција и увоз на многу големи количини на дрога за францускиот и европскиот пазар.
Размената на пораките се одвивала во периодот од февруари 2020 година до февруари 2021 година, а врз основа на нив е идентификуван водачот на мафијата, кој има српско потекло.
11-те, вклучително и неодамна пензионираниот полицаец кој работел за правосудната полиција на Монако, беа изведени пред истражен судија во понеделникот вечерта и обвинети како дел од повеќекратната судска истрага. На девет од овие осомничени им е одреден притвор.
Францускиот весник „Ле Паризиен“ наведува дека оваа мафија, чии членови се и српски државјани, се занимавала и со трговија со оружје, вклучувајќи митралези и автомати.
