На 14 јуни, со почеток во 20 часот, во кафе „Ли“ ќе биде промовирана книгата „Бајачките обреди како дел од македонската народна култура“ од м-р Ана-Марија Бранѓолица, во издание на „Фуснота“. Промотор на книгата ќе биде Душко Крстевски.
-Предмет на истражување во научниот труд на Ана-Марија Бранѓолица е феноменот на баењето, како интегрален дел од македонската народна култура, а опсервацијата на баењето како магиски обред вклучува детално истражување на обредните постапки и реквизити што ги применува лицето што бае и што раководи со обредот. Една од клучните цели во истражувањето на Бранѓолица е да покаже дека баењата претставуваат централна сила во исцелувателската улога, каде што баењето како севкупно истражување има своја логика и своја поетика, па оттука произлегува и главната цел на овој исклучителен научен труд на авторката. Токму затоа, научното истражување на Ана-Марија Бранѓолица заслужува посебно внимание во нашата книжевност и во нашиот простор кај читателите, а особено добива свој простор за понатамошна дискусија, посочува промоторот Крстевски.
Главен уредник на книгата е Драгана Евтимова, а дизајнот на корица го изработи Мите Спасовски.
