Новиот роман од популарниот автор Зоран Спасов Sоф „И јас сум Сирма“м ќе биде промовиран на 14 ноември (20 ч.) во Младинскиот културен центар. Книгата, која е во издание на „Попули“, дел од „Арс Ламина – публикации“, ќе ја промовира Татјана Алексиќ, а модераторка на настанот ќе биде уредничката Татјана Димовска-Атанасова. Специјална гостинка, во улога на Сирма, ќе биде младата актерка Јована Спасиќ. По промоцијата, ќе настапи „Сирма rock’n’roll бенд“.
„’И јас сум Сирма’ не е роман, туку нешто меѓу сага и еп. Станува збор за збирка приказни што ‘авторката’ ги има собирано во изминативе 16 века. Таа вели дека сè што напишала e вистина, но искрено мислам дека некои делови се пренесени со прекумерна доза на патриотизам. Особено кон соседите. Но, таков е нејзиниот табиет: горд, искрен, чесен, мил, полн со емпатија. Напати ме потсетува на некого: на мајка ти, баба ти, на мајка ми… но, најмногу од сè ми личи на Македонија. Двете делат иста судбина, со секој здив, со секој збор, со секоја реченица. ‘Авторката’ не ја познавам лично, но имам чувство дека цело време е тука некаде, на дофат. Кога издавачот ми го прати текстот да напишам рецензија, не наидов на ништо што не ми е познато. Имав впечаток дека секоја страница од оваа историска читанка ја има некаде во нашите гени. За некои од ликовите можеби не сте чуле или, пак, имате погрешна слика, но сите тие се јунаци…“, се вели во најавата на промоцијата.
Зоран Спасов Sоф е познат скопски лик, филантроп и автор на хит-книгите „Тито, мојот претпоследен херој“, „Торонто експрес“, „Џабе живиш у Скопје“ и „Цепај сине: пошто џабе живиш у Македонија“.
