Американскиот дигитален гигант Мета го одложува лансирањето на својот нов софтвер за вештачка интелигенција (ВИ) во Европа поради загриженоста на агенциите за заштита на податоците, пишува германската новинска агенција dpa.
Ирското тело за заштита на податоци задолжено за Мета во Европската унија побара од компанијата засега да не ги тренира своите модели со вештачка интелигенција врз основа на јавно достапни објави на социјалните мрежи Фејсбук и Инстаграм.
„Без обука со локална содржина, Мета не може да им понуди на корисниците во Европа најдоброто искуство“, се вели во блогот на компанијата.
Воедно од компанијата наведуваат дека се убедени оти нивниот пристап е во согласност со европските закони и прописи.
„Мета не е единствената која тренира вештачка интелигенција и ние сме потранспарентни од многу други во нашата индустрија“, објави компанијата.
Одлуката за одложување дојде по критиките дека Мета само им дава на луѓето опција да се спротивстават на користењето на нивните податоци, но не побара од нив експлицитна согласност.
Активистите за заштита на податоци од организацијата НОЈБ потоа поднесоа жалби во 11 земји минатата недела и го критикуваа Мет за „скриени и погрешни процедури“.
Компанијата Мета првично тврдеше дека постои „легитимен интерес“ за обука на модели со вештачка интелигенција и дека за таа цел треба да се користи само јавно достапна содржина од возрасни корисници.
Органот за заштита на податоците на Ирска во петокот ја поздрави одлуката на Мета да ги прекине своите планови во Европа.
Компанијата користи софтвер за вештачка интелигенција Meta AI за да се натпреварува со други програми како што е chatbot ChatGPT.
