Домашна запалива бомба експлодира денеска во државно средно училиште во Чиле, предизвикувајќи пожар во кој беа повредени најмалку 35 ученици, од кои неколку се критични, соопштија пожарникарите.
Група ученици во училиште во центарот на главниот град Сантијаго направиле молотови коктели во бањата за подоцна да ги фрлат на протест, а еден експлодирал.
Не е јасно што ја предизвикало експлозијата.
Противпожарната служба соопшти дека 11 ученици во престижниот национален интернат Барос Арана се хоспитализирани и во тешка состојба, со изгореници кои го зафатиле нивниот респираторен систем.
Останатите ученици се здобиле со полесни изгореници, додаваат надлежните, додека наставникот кој се обидувал да им помогне на учениците колабирал.
Пожарникарите брзо го локализирале пожарот и ги блокирале патиштата околу местото на настанот.
Полицијата соопшти дека учениците планирале улични демонстрации подоцна истиот ден.
За време на големите демонстрации во 2011 и 2019 година, средношколците и студентите заземаа конфронтирачки став против владата и бизнис елитата, барајќи политички реформи.
