Во јужната кинеска провинција Гуангдонг, повеќе од 570.000 жители се евакуирани поради супертајфунот Јаги, кој вечерва ќе го погоди копното на таа провинција, поради што е во сила црвен метеоролошки аларм, соопштија метеоролозите.
Супертајфунот денеска стигна до јужната кинеска провинција Хаинан, а достигна брзина од 234 километри на час, јави агенцијата Синхуа. Поради тајфунот во прекин е железничкиот и патниот сообраќај, а училиштата во 10 градови се привремено затворени. Се очекува тајфунот до вечерва да ги погоди крајбрежните области од градот Венгчанг во провинцијата Хаинан до Леижоу во провинцијата Гуангдонг.
Министерството за водни ресурси го зголеми предупредувањето за поплави во Гуангдонг и Хаинан на трето ниво и испрати четири тима да ги насочат напорите за спречување на поплави во Хаинан и Гуангдонг.
Исто така, беше најавено дека се прават напори да се следи движењето на тајфуните, да се водат локалните самоуправи во протоколите за превенција од катастрофи и да се обезбеди безбедност на животот и имотот. На почетокот на неделава тајфунот Јаги однесе најмалку 16 животи на Филипините, а супертајфунот се очекува да ги погоди Виетнам и Лаос во текот на викендот, пренесува Танјуг.
