Австралискиот тенисер Алексеј Попирин ја шокираше тениската јавност со победата над Новак Ѓоковиќ во 3. коло на САД опен. На прашањето дали му е ова најголемиот успех во кариерата, тој одговори:
– За мене, победата во Монтреал беше многу поголема од оваа денес, само затоа што е титула,, а исто така, е и титула на мастерс 1000. Беше неверојатно! Денеска, победата е нешто што верував дека можам да го постигнам. Освојувањето мастерс 1000 никогаш не ми паднало на ум.
Нему оваа сезона му помогнаа двата грен-слем пораза против Ѓоковиќ.
– Но, моите две искуства против него претходно оваа година, на Австралија опен и на Вимблдон, некако ми дадоа самодоверба да излезам на теренот и да верувам дека можам да победам, и го направив тоа. Значи, кога го направив тоа, имав чувство дека сум во право, докажав дека размислувам правилно. Да, тоа не беше нешто толку неверојатно како Монтреал – рече Попирин.
Првиот светски рекет, Јаник Синер, пак, рутински и без тешкотии се пласира во осминафиналето, откако беше подобар во третата рунда од Кристофер Оконел со 3:0. Неполни два часа (час и 56 минути) му беа потребни на италијанскиот тенисер да ја прескокне третата пречка во Њујорк.
Синер го доби првиот сет експресно, со два брејка и користејќи ја првата сет-топка за 6:1. Веќе во вториот, Оконел се обиде да парира, успеа во надигрувањето, ама немаше сили за изненадување. Италијанецот го доби и овој сет, но со еден брејк и 6:4. Немаше проблеми ниту во третиот сет, бидејќи отвори со одземен сервис, а потоа, со вториот брејк, направи исчекор и со 6:2 по првата меч-топка, дојде до победата. Во осминафиналето, Синер го чека подобриот од пресметката меѓу Дијало и Пол.
Рускиот тенисер Данил Медведев славеше над Флави Коболи и се пласира понатаму на САД опен. Шампионот од 2021 година победи со резултат 6:3, 6:4, 6:3, по нешто помалку од два и пол часа игра. Следен ривал ќе му биде Португалецот Нуно Боржеш, кој го совлада Јакуб Меншик со 6:7, 6:1, 3:6, 7:6, 6:0.
